Աշխատանքային հանդիպում-քննարկում <<Ֆակտորինգը որպես արդյունավետ վաճառքների խթանման մոդել>>

Հայաստանում գյուղական տարածքների տնտեսական զարգացման հիմնադրամը և Հիմնադրամի կողմից ընտրված խորհրդատու Հրաչիկ Քոչինյանը,  Իմպերիում Պլազա բիզնես կենտրոնի  կոնֆերանսների դահլիճում  <<Ֆակտորինգը որպես արդյունավետ վաճառքների խթանման մոդել>> խորագրով աշխատանքային հանդիպում-քննարկումներ անցկացրեցին ունիվերսալ վարկային կազմակերպությունների ղեկավար անձնակազմի (սույն թվականի հոկտեմբերի 3-ին), հայաստանյան բանկերի ղեկավար անձնակազմի (սույն թվականի հոկտեմբերի 4-ին) և գյուղատնտեսական ապրանքներ արտադրող, վերամշակող և արտահանող hայաստանյան ընկերությունների ղեկավար անձնակազմի (սույն թվականի հոկտեմբերի 5-ին) հետ:

Աշխատանքային հանդիպում–քննարկումների ընթացքում Հիմնադրամի խորհրդատուն և Հիմնադրամի գլխավոր ներդրումային մասնագետ, խմբի ղեկավար Ներսես Կյուրինյանը նշված կազմակերպությունների ներկայացուցիչներին ներկայացրեցին Հիմնադրամի խորհրդատուի կողմից գյուղատնտեսական ապրանքներ արտադրողների և վերամշակողների համար մշակված  ֆակտորինգային ծառայության ծրագիրը: Նշված ծրագիրը ստեղծվել է հիմնվելով հայաստանյան ֆակտորինգային շուկայի գնահատման արդյունքների, ֆակտորինգային ծառայության կարիքներն ու առանձնահատկությունները սահմանելու նպատակով Հայաստանում գործող  ֆինանսական կառույցների, Հիմնադրամի և նրա հաճախորդ ընկերությունների ներկայացուցիչների հետ անցկացված հանդիպումների արդյունքների և այլնի վրա:  

Հանդիպումների ընթացքում քննարկվեցին ծրագրի արդյունավետությունը, ռիսկայնությունը, հնարավորությունները և հետագա քայլերը: